Биринчи лига. 1/8 финал ўйинлари 4-7 ноябр кунлари Тошкентда бўлиб ўтади
Кеча — 21-октябр куни Биринчи лиганинг ҳудудий босқичи ўз якунига етди. Илк бор 3 та зонага бўлиб ўтказилган мусобақа ғолиби ноябр ойида аниқланади.
“Биринчи лига регламенти”дан келиб чиқиб, ҳар зонанинг энг яхши 5 тадан жамоаси плей-офф босқичига йўлланмани қўлга киритди. Ўз ҳудудида энг яхши бўлган иккитадан умумий 6 та жамоа ҳамда уч зонанинг 2 та энг яхши 3-ўрин эгалари плей-офф қуръаси олдидан биринчи саватчадан жой олади.
Қолган 7 та жамоа ва регламент бўйича мусобақага Лига томонидан таклиф этиладиган меҳмон жамоа иккинчи саватчадан жой олади.
Плей-оффнинг 1/8 финал босқичи ўйинлари 4, 5, 6, 7-ноябр кунлари, мос равишда ¼ финал 23-24 ноябр, ½ финал 26-ноябр ҳамда финал учрашуви 28-ноябр куни ўтказилади. Барча беллашувларга Тошкентдаги Одил Аҳмедов футбол академияси майдони мезбонлик қилади.
1/8 финалга қуръа бугун — 18:00 да ташланади. Жараён Лиганинг расмий саҳифалари орқали жонли кўрсатилади.
