«Бешиктош» Салоҳ трансферини якунлашга яқин
Туркиянинг "Бешиктош" клуби "Ливерпуль" ҳужумчиси Муҳаммад Салоҳ трансфери устида ишни давом эттирмоқда ва яқин кунларда келишувни якунлашга умид қилмоқда. Бу ҳақда Sporx нашри Sabahга таяниб хабар берди.
Манбага кўра, томонлар аввалроқ принципиал келишувга эришган эди. Бироқ футболчининг вакиллари қўшимча талаблар қўйгач, трансфер расмийлашуви кечиккан.
Қайд этилишича, "Бешиктош" президенти Сердал Адалим Салоҳ учун аввал таклиф қилинган 12 миллион евролик пакетни ошириш ниятида эмас. Клуб раҳбарияти мисрлик футболчи вакилларининг юқори молиявий талабларини қабул қилмаслигини билдирган. Шунга қарамай, музокаралар давом этмоқда ва сўнгги икки кун ичида томонлар ўртасида фаол алоқалар бўлиб ўтган. Компромиссга эришиш эҳтимоли ҳам мавжуд.
Хабар қилинишича, Салоҳнинг вакиллари яқин вақт ичида яна Истанбулга келиб, клуб раҳбарияти билан учрашади. Бу музокара ҳатто бугуннинг ўзидаёқ бўлиб ўтиши мумкин.
Шунингдек, футболчининг рафиқаси Истанбулга кўчиб ўтиш ғоясини қўллаб-қувватлаётгани ва бу қарорга муайян таъсир ўтказаётгани таъкидланган.
Манбанинг ёзишича, Салоҳнинг ўзи шахсий шартнома шартлари бўйича ҳеч қандай эътирозга эга эмас. Агар унинг вакиллари дастлаб келишилган молиявий шартларга қайтса, трансфер дарҳол якунланади.
"Бешиктош" режасига кўра, келишув эртагача тўлиқ ёпилиши ва футболчи пайшанба куни "Тюпраш" стадионида "Мидтьюлланн"га қарши учрашув олдидан мухлисларга расман таништирилиши керак. Шу боис агент Рами Аббос билан бугун бўлиб ўтадиган учрашув ҳал қилувчи аҳамият касб этиши мумкин.
Эслатиб ўтамиз, "Ливерпуль" Муҳаммад Салоҳни 2017 йили "Рома"дан 42 миллион еврога сотиб олган эди. Миср терма жамоаси сафида 2026 йилги жаҳон чемпионатида иштирок этган Салоҳ бир гол ва икки голли узатма муаллифи бўлган.
