Бернарду Силванинг «Барселона»га ўтишига бир қадам қолди
Португалиялик яримҳимоячи Бернарду Силва эркин агент мақомида «Барселона»га ўтишига бир қадам қолди. Бу ҳақда инсайдер Николо Скира хабар бермоқда.
Манбанинг таъкидлашича, 31 ёшли футболчи «кўк-анорранглилар» билан 2028 йилгача мўлжалланган шартнома имзолайди. Шунингдек, унда битимни яна бир йилга — 2029 йилгача узайтириш банди ҳам кўзда тутилган.
Аввалроқ AS нашри Бернарду Силванинг номзоди Мадриднинг «Реал» клубига таклиф қилингани ҳақида хабар берган эди. Marca эса Мадриднинг «Атлетико» клуби яримҳимоячи билан икки йиллик (яна бир мавсумга узайтириш имконияти билан) шартнома имзолашга тайёр бўлгани ҳақида маълум қилган эди.
30 июн куни Бернардунинг 2017 йилдан буён тўп суриб келаётган «Манчестер Сити» билан шартномаси якунга етади. Якунланаётган мавсумда португалиялик футболчи барча турнирларда 53 та ўйинда майдонга тушиб, 3 та гол ва 5 та голли узатмани ўз ҳисобига ёздириб қўйди.
