«Бенфика» УЕФАнинг Вальверде бўйича чиқарган қарорига норози
Лиссабоннинг «Бенфика» клуби УЕФАнинг «Реал Мадрид» яримҳимоячиси Федерико Вальвердега нисбатан интизомий чора кўрмаслик ҳақидаги қарорига кескин норозилигини билдирди.
Чемпионлар Лигасининг плей-офф босқичи биринчи учрашувининг 82-дақиқасида Вальверде «Бенфика» ҳимоячиси Самуэл Далга зарба берган эди. Швед футболчиси бошини чанглаб майдонга йиқилган бўлса-да, учрашув бош ҳаками Франсуа Летексье бу вазиятда уругвайлик футболчини жазоламади.
Португалия клуби ўйиндан сўнг УЕФАга расмий шикоят киритиб, ушбу қўполлик учун Вальвердега қизил карточка кўрсатилиши шарт бўлганини таъкидлади. Бироқ УЕФА ушбу мурожаатни рад этди ва Федерико Вальверде иштирокидаги воқеа қайта кўриб чиқилмаслигини маълум қилди.
«Клубимиз Самуэл Далга нисбатан амалга оширилган ҳужумнинг фото-далиллари мавжудлигига қарамай, УЕФА ҳеч қандай интизомий чора кўрмасликка қарор қилганидан афсусдамиз.
Ушбу вазият ўйин вақтида кўрсатилмаган қизил карточкага лойиқ эканлигига шубҳа йўқ эди. Шикоятимиз рад этилгани сабабли, энди ҳеч қандай қўшимча санкциялар қўлланилмайди», — дейилади «Бенфика» баёнотида.
Шу тариқа, Вальверде жавоб ўйинида иштирок этиш ҳуқуқини сақлаб қолди, бу эса «Бенфика» раҳбариятининг жиддий эътирозларига сабаб бўлди.
