«Бенфика» Престианнининг дисквалификацияси юзасидан УЕФАга апелляция беради
Лиссабоннинг «Бенфика» клуби УЕФА томонидан яримҳимоячи Жанлука Престианнига нисбатан чиқарилган вақтинчалик дисквалификация қарорига расмий муносабат билдирди.
Эслатиб ўтамиз, Чемпионлар Лигасининг плей-офф босқичи биринчи ўйинида (0:1) «Реал» вингери Винисиус Жуниор аргентиналик футболчи уни «маймун» деб ҳақоратлаганини даъво қилган эди. УЕФА ушбу ҳолат бўйича суриштирув бошлаган ва бугун, 23 февраль куни Престианнини жавоб ўйинидан четлатишга қарор қилди.
«Бенфика» клубининг расмий баёнотида шундай дейилади:
«Клуб суриштирув ишлари якунланмасдан туриб футболчидан айрилганидан афсусда ва УЕФАнинг ушбу қарори устидан апелляция беради. Гарчи вақт нуқтаи назаридан бу жавоб ўйинига таъсир қилмаслиги эҳтимоли юқори бўлса-да, биз ўз позициямизини ҳимоя қиламиз.
Шунингдек, «Бенфика» ирқчилик ва камситишнинг ҳар қандай кўринишига қарши курашда содиқлигини яна бир бор тасдиқлайди. Бу қадриятлар бизнинг тарихимиз, кундалик фаолиятимиз ва клуб афсонаси Эйсебио каби буюк шахсларимиз меросининг бир қисмидир».
Шу тариқа, Престианни «Сантьяго Бернабеу»да бўлиб ўтадиган жавоб баҳсини ўтказиб юборадиган бўлди. Аммо клуб ўз футболчисининг айбсизлигига ишонмоқда ва унинг нуфузини ҳимоя қилишда давом этади.
