«Бенфика» «Порту»ни жазолашни талаб қилди
«Бенфика» Португалия чемпионатидаги «Порту»га қарши классикодан сўнг рақиб клубга нисбатан жиддий санкциялар қўллашни талаб қилди. Лиссабон клуби Португалия футбол федерацияси Интизом кенгашига расмий мурожаат юборган. Бу ҳақда A Bola нашри хабар бермоқда.
Манбага кўра, «Бенфика» «Порту» захира ўриндиғи вакилларининг хатти-ҳаракатларидан шикоят қилган. Хусусан, мезбонлар ходимларидан бири «Бенфика» делегацияси ва захира ўриндиғи томон ҳақоратли имо-ишоралар қилгани айтилмоқда. Шунингдек, клуб Габри Вейганинг «Бенфика» техник ҳудуди томон сув идишини отгани учун ҳам жазоланишини талаб қилмоқда.
Лиссабонликлар стадиондаги мусиқа ва кўнгилочар дастурлар орқали «Бенфика» мухлисларига атайлаб провокация қилинганини ҳам даъво қилган. Клуб ушбу ҳолатлар жиддий қоидабузарлик сифатида баҳоланиб, ҳатто «Estádio do Dragão» стадионида ўйин ўтказишни вақтинча тақиқлашгача бўлган санкция қўлланишини сўрамоқда. Бундан ташқари, «Бенфика» захира ўриндиғидан олинган ва кейинчалик Porto Canal орқали намойиш этилган тасвирларнинг қонунийлигини ҳам текширишни талаб қилган.
Маълумот учун, 20-сентябрь куни Португалия чемпионатининг 7-турида «Порту» ўз майдонида «Бенфика»ни 3:1 ҳисобида мағлуб этди. «Бенфика» учрашувнинг 35-дақиқасидан бошлаб Клеман Ленгле четлатилгач, ўн киши бўлиб ўйнади.
