«Бенфика» Моуриньюни истеъфога чиқармоқчи эмас
Португалиянинг «Бенфика» клуби бош мураббий Жозе Моуриньюни 17 майга қадар озод этишни режалаштирмаяпти. Бироқ ушбу санадан сўнг клуб Моуриньюнинг «Реал»га ўтишига розилик бериши мумкин, деб хабар беради машҳур журналист Ягыз Сабунджуоглу.
Клубнинг молиявий шартлари ҳам белгиланган: агар Моуринью «Реал»га кўчса, Лиссабон клуби 6 миллион евро компенсация олади.
Манбанинг маълумотига кўра, Жозе Моуринью ҳали ҳам «Реал» билан музокараларни олиб бормоқда. Томонлар мутахассиснинг Мадридга қайтиши имкониятини муҳокама қилишмоқда.
Асосий сана — 17 май. Шундан сўнг музокаралар тезлашиши ва португал мураббийнинг келажаги аниқланиши мумкин. Бу куни «Бенфика» мавсумнинг сўнгги учрашувини «Эшторил»га қарши меҳмонда ўтказади. Лиссабонликлар ҳали ҳам «Спортинг» билан бирга Чемпионлар лигасига йўл олмоқчи.
