«Бенфика» Моуриньуни «Реал»га бериб қўймоқчи эмас — манба
Лиссабоннинг «Бенфика» клуби раҳбарияти бош мураббий Жозе Моуриньуни жамоада сақлаб қолиш учун ҳаракатларни бошлаб юборди. Мадриднинг «Реал» клуби томонидан мутахассисга қизиқиш билдирилаётгани фонда, «буркутлар» президенти Руй Кошта Моуринью билан учрашиб, келаси мавсум режаларини муҳокама қилди. Бу ҳақда O Jogo нашри хабар бермоқда.
Манбанинг маълум қилишича, «Бенфика» раҳбарияти португалиялик мураббий билан амалдаги шартномани 2028 ёки 2029 йилгача узайтирмоқчи. Айни дамдаги келишув 2027 йилнинг ёзигача мўлжалланган бўлса-да, унда хавфли бир банд мавжуд.
Моуриньюнинг ҳозирги шартномасига кўра, мавсум якунланганидан кейин 10 кун ичида у 3 миллион евро товон пули эвазига клубни тарк этиш ҳуқуқига эга.
Ушбу ҳолат Мадриднинг «Реал» клубини тезроқ қарор қабул қилишга ундамоқда. Агар «қироллик клуби» Моуриньюни қайтаришни истаса, ушбу 10 кунлик муддатдан унумли фойдаланиб қолиши лозим. Акс ҳолда, мураббий «Бенфика» билан шартномани узайтириши ва унинг нархи бир неча баробарга ортиши мумкин.
