Беллингем: «Мен ҳар куни профессионалликни сақлаб қоламан, қолган барча гаплар эса — сафсата»
Мадриднинг «Реал» клуби яримҳимоячиси Жуд Беллингем УЕФА Чемпионлар Лигаси чорак финали доирасидаги «Бавария»га қарши жавоб учрашуви олдидан ўзининг майдон ташқарисидаги гўёки носпортча хулқ-атвори ҳақида тарқалган миш-мишларга муносабат билдирди.
«Бу ҳақда аввал ҳам айтган бўлсам керак: шахсий ҳаётни профессионал фаолият билан аралаштириб юбормаслик лозим. Гўёки мен кўп спиртли ичимлик истеъмол қилганим ва кўнгилочар масканларга тез-тез бориб турганим ҳақида ҳақиқатга тўғри келмайдиган маълумотлар тарқалди. Буларнинг ҳеч бири ҳақиқат эмас. Мен ҳар куни профессионалликни сақлаб қоламан, қолган барча гаплар эса — сафсата», — деди Беллингем.
Маълумот учун, Беллингем жорий мавсумда клуб миқёсида ўтказилган 32 та ўйинда 6 та гол урди ва 4 та самарали узатмани амалга оширди.
