Бельгия FIFA’дан Балогун иши бўйича изоҳ кутмоқда
Бельгия футбол федерацияси Фоларин Балогуннинг ЖЧ-2026 вақтида олган қизил карточкаси билан боғлиқ баҳсли қарор юзасидан FIFA’дан ҳанузгача аниқ жавоб олмаганини маълум қилди. Федерация ушбу масалага етарлича изоҳ берилмаса, Жанни Инфантинонинг FIFA президенти лавозимига қайта сайланишини қўллаб-қувватламаслигини билдирди.
Балогун АҚШ терма жамоасининг Босния ва Герцеговинага қарши учрашувида қизил карточка олган ва регламентга кўра Бельгияга қарши нимчорак финал баҳсини ўтказиб юбориши керак эди. Бироқ FIFA унинг автоматик бир ўйинлик дисквалификациясини тўхтатиб, футболчига Бельгияга қарши майдонга тушишга рухсат берди. Қарор АҚШ президенти Дональд Трамп FIFA раҳбари Жанни Инфантинони вазиятни қайта кўриб чиқишга чақирганидан кейин қабул қилингани катта баҳсларга сабаб бўлди.
Бельгия федерацияси қарор қандай асосда қабул қилингани ва келажакда шунга ўхшаш ҳолатларга қандай ёндашилиши бўйича тушунтириш талаб қилмоқда. Масалани 15 октябрь куни бўлиб ўтадиган FIFA кенгаши йиғилиши кун тартибига киритиш сўралган. Бельгияликлар FIFA бошқарувидаги шаффофлик билан боғлиқ бошқа масалаларни ҳам кўтариб, Инфантинога бўлган ишонч масаласини очиқ қолдирмоқда.
