Белгия етакчи, Миср сенсация тарорлашга тайёр, Эрон ҳам юқори мақсад билан. G гуруҳи билан танишамиз
G гуруҳида тўрт жамоа турли қитъалардан ташриф буюрган ва энг муҳими — бутунлай бошқа-бошқа футбол маданиятини намоён этади.
Белгия ҳали ҳам “олтин авлод” меросидан фойдаланмоқда, бироқ таркибга янги қон ҳам кириб келмоқда. Миср таркибида эса икки нафар АПЛ юлдузи — Муҳаммад Салоҳ ва Омар Мармуш бор.
Эрон атрофида эса анча баҳслар бўлди: сиёсий вазият, хавфсизлик ва логистика муаммолари тайёргарликка таъсир қилди. Шунга қарамай, жамоа мундиалда иштирок этади. Янги Зеландия эса синф жиҳатидан камчиликларга қарамасдан, жамоавий руҳ ва курашчанлик билан мухлисларни қувонтириши кутилмоқда.
Белгия
Мураббий
Руди Гарсия 2025 йилда жамоа бошқарувини ўз қўлига олди. Унинг асосий вазифаси — “олтин авлод”дан кейинги даврни қайта қуриш ва жамоага янги нафас бағишлаш.
Белгия термаси босқичма-босқич янгиланмоқда: тажрибали ўйинчиларга ишонч сақланмоқда, шу билан бирга ёшлар ҳам асосий таркибга киритилмоқда. Гарсия Тибо Куртуани термага қайтарди ва Ромелу Лукакуга ишонч билдирди.
Юлдузлар
Жамоанинг асосий фигураси — Кевин Де Брюйне (“Наполи”). У жароҳатлар сабаб мавсумнинг ярмини ўтказиб юборган бўлса-да, соғлом ҳолда ҳали ҳам юқори даражада ўйнай олади.
Ромелу Лукакунинг ҳолати эса савол остида. Унинг ўйин амалиёти кам бўлди, бироқ унинг кучли жиҳатлари — жисмоний кураш, шерикларга имконият яратиш — сақланиб қолган.
Дарвоза чизиғида эса Тибо Куртуа (“Реал Мадрид”) каби ишончли посбон бор.
Янги авлоддан энг ёрқин ном — Жереми Доку (“Манчестер Сити)”. У турнир давомида жамоанинг энг яхши ўйинчисига айланиб кетиши ҳам мумкин.
Мақсад
Белгия гуруҳдан биринчи ўрин билан чиқиши кутилмоқда. Жамоа камида бир-икки босқичдан ўтиши мумкин. Чорак финал — яхши натижа, аммо 2018 йилдаги бронзани такрорлаш қийин.
Чемпионлик эҳтимоли (Opta): 2,4%
Миср
Мураббий
Хоссам Хассан жамоага янги руҳ олиб кирди. Унинг қўл остида мисрликлар ҳужумкор ва жасоратлироқ ўйнай бошлади. Кучли рақибларга қарши жамоа ҳимояга чекинади, аммо қарши ҳужумларда жуда хавфли.
Юлдузлар
Жамоанинг юраги — Муҳаммад Салоҳ. Унинг учун бу охирги жаҳон чемпионати бўлиши мумкин ва у тарих ёзишни истайди.
Энди унинг ёнида Омар Мармуш (“Манчестер Сити”) ҳам бор. Бу иккилик рақиблар учун катта муаммо туғдиради.
Мақсад
Миср ҳалигача жаҳон чемпионатларида бирорта ҳам ғалаба қозонмаган. Асосий мақсад — шу “лаънат”ни бузиш. Плей-оффга чиқиш эса мамлакат тарихидаги улкан ютуқ бўлади.
Чемпионлик эҳтимоли (Opta): 0,4%
Эрон
Мураббий
Амир Галенои жамоани янги босқичга олиб чиқишга ҳаракат қилмоқда. Унинг мақсади — тарихда илк бор плей-оффга чиқиш.
Жамоа интизомли, бироқ таркиб қариб бормоқда. Бу турнир кўплаб етакчилар учун сўнгги имконият бўлиши мумкин.
Юлдузлар
Асосий юлдуз — Мехди Тареми. У ҳали ҳам жамоа ҳужумининг асосий кучидир. Марказда эса Мохаммад Мохеби (“Ростов”) ҳаракат қилади.
Мақсад
Сиёсий ва ташкилий муаммолар жамоага таъсир қилиши мумкин. Бироқ янги формат туфайли Эрон ҳатто учинчи ўрин билан ҳам плей-оффга чиқиши мумкин. Бу мамлакат учун тарихий натижа бўлади.
Чемпионлик эҳтимоли (Opta): 0,2%
Янги Зеландия
Мураббий
Даррен Базили жамоани узоқ йиллик тизим орқали олиб келди. Янги формат Океанияга тўғридан-тўғри йўлланма берди ва бу жамоага катта имконият яратди.
Юлдузлар
Асосий фигура — Крис Вуд (“Ноттингем Форест”). Шунингдек, ҳимоячи Тим Пейн атрофида қизиқ ҳикоя шаклланди: у ижтимоий тармоқларда кутилмаганда жуда машҳур бўлиб кетди ва мухлислар уни ҳазиломуз тарзда “энг буюк ўйинчи” деб аташмоқда.
Мақсад
Янги формат сабаб ҳатто бундай жамоалар ҳам плей-офф ҳақида орзу қила олади. Биргина ғалаба ҳам барча режаларни ўзгартириши мумкин.
Агар Янги Зеландия тарихий ғалабага эришса, бу катта сенсация бўлади.
Чемпионлик эҳтимоли (Opta): 0,1%
