Бектемир Мелиқўзиев WBA чемпионлик камари учун мажбурий даъвогарга айланди
Ўзбекистонлик профессионал боксчи Бектемир Мелиқўзиев WBA талқинида супер ўрта вазн тоифасида жаҳон чемпионлик камари учун расмий мажбурий даъвогар мақомини олди. Ташкилот амалдаги чемпион мексикалик Хайме Мунгияга камарини Мелиқўзиевга қарши ҳимоя қилиш мажбуриятини юклади. Бу ҳақда WBA расмий сайти хабар бермоқда.
WBA қарорига кўра, боксчилар жамоаларига жанг шартлари бўйича келишиб олиш учун 21-октябргача вақт берилган. Агар томонлар келишувга эриша олмаса, ташкилот жангни ўтказиш ҳуқуқи учун промоутерлар ўртасида очиқ савдо — purse bid эълон қилиши мумкин.
Мунгия 2026-йил 2-май куни Лас-Вегасда Хосе Армандо Ресендисни ҳакамларнинг якдил қарори билан мағлуб этиб, WBA камарини қўлга киритган. Мелиқўзиев эса айни пайтда WBA рейтингида супер ўрта вазн тоифасида 1-ўринда турибди ва чемпионнинг расмий мажбурий даъвогари ҳисобланади.
Маълумот учун, Бектемир Мелиқўзиев 1996-йил 8-апрелда Қўқонда туғилган. У Рио-2016 Олимпиадасининг кумуш медали совриндори, икки карра жаҳон чемпионати совриндори ва икки карра Осиё чемпиони ҳисобланади.
