«Бавария» молиявий талаблар сабабли Кеннет Айххорн трансферидаn воз кечди
Мюнхеннинг «Бавария» клуби «Герта»нинг 16 ёшли яримҳимоячиси Кеннет Айххорнни сотиб олиш фикридан қайтди, деб хабар бермоқда Kicker нашри.
Бунга футболчининг томони талаб қилган ҳаддан ташқари юқори молиявий шартлар асосий сабаб бўлган: ўйинчи, унинг оиласи ва агентлари учун сўралган бонус миқдори жуда катта суммани ташкил этиши ва якунда «Герта»га тўланадиган компенсация миқдоридан ҳам ошиб кетиши мумкин эди.
Клуб спорт директори Макс Эберлнинг қизиқиши ва футболчининг вакиллари билан алоқага чиққанлигига қарамай, «Бавария» раҳбарияти бир неча ой аввал ҳам ушбу келишувга шубҳа билан қараган эди. Охирги музокаралар эса раҳбариятнинг бу борадаги позициясини янада мустаҳкамлади.
Ҳозирда мюнхенликлар ўз академияси тарбияланувчиларини ривожлантиришни устувор вазифа деб билишмоқда. Клуб ижарадан қайтадиган ярим ҳимоячи Ноэль Асеко-Нкилига ҳамда мушак жароҳатидан тузалаётган Давид Сантушнинг ўсишига умид боғламоқда.
Шунга қарамай, Айххорнга бўлган қизиқиш бутунлай йўқолгани йўқ: футболчи атрофидаги вазиятни «Байер» ва «RB Лейпциг» клублари диққат билан кузатиб бормоқда. Transfermarkt портали ёш иқтидор эгасини 20 миллион еврога баҳолаган.
