“Бавария” “Ливерпуль” футболчисига кўз тикди: сабаб — Майкл Олисе атрофидаги ноаниқлик
“Бавария” “Ливерпуль” ярим ҳимоячиси Флориан Вирцнинг трансферини кўриб чиқмоқда. Мюнхен клуби бу вариантни жамоанинг ҳужумкор футболчиси Майкл Олисенинг келажаги борасидаги ноаниқлик сабаб ўрганмоқда. Бу ҳақда Bild хабар бермоқда.
Манбага кўра, “Бавария” Олисесиз таркибни шакллантириш вариантларини ҳам кўриб чиқмоқда. Франциялик футболчининг клубдаги узоқ муддатли келажаги ҳозирча аниқ эмас. Шунингдек, унинг Испания клубларидан бирига ўтиши мумкинлиги ҳақида миш-мишлар тарқалган.
Хусусан, ёзги трансфер ойнасида “Реал Мадрид” Олисени таркибига қўшишга уринаётгани ҳақида хабарлар чиққан. Шунингдек, Франция терма жамоасидаги шериги Килиан Мбаппе уни Мадрид клубига ўтишга кўндиргани ҳақида ҳам маълумотлар тарқалган.
Маълумот учун, Флориан Вирц 2025 йил июнида “Байер”дан “Ливерпуль”га ўтган. Германиялик футболчи аввал “Бавария”нинг ҳам трансфер мақсадларидан бири бўлган.
