«Бавария» Харри Кейн билан шартномани узайтиришга тайёрлигини билдирди
«Бавария» бош директори Ян-Кристиан Дрезен ҳужумчи Харри Кейн билан шартномани узайтириш масаласига тўхталиб ўтди.
«Харрининг амалдаги шартномаси 2027 йилга қадар мўлжалланган, уни сотиб олиш бўйича белгиланган товон пули банди эса январ ойида ўз кучини йўқотган. Харри билан муносабатларимиз аъло даражада, унинг ўзи ва оиласи Мюнхенда ўзларини жуда қулай ҳис қилишмоқда. Келаси мавсум олдидан у билан келажак режаларини хотиржам муҳокама қилиб оламиз. Биз унинг кўрсатаётган ўйинидан жуда мамнунмиз», — дейди Дрезен.
Англиялик ҳужумчи 2023 йилнинг ёзида «Тоттенхэм»дан мюнхенликлар сафига келиб қўшилган эди. Ўшандан буён у жамоа таркибида 133 та учрашувда майдонга тушиб, 130 та гол урди ва 31 та голли узатмани амалга оширди. Transfermarkt портали маълумотларига кўра, футболчининг бозор қиймати айни пайтда 65 миллион еврони ташкил этади.
