“Барселона”да Рафинья ва Педрининг “Олтин тўп” рўйхатига киритилмагани кескин танқид қилинди
“Барселона” спорт директори Деку Рафинья ва Педрининг 2026 йилги “Олтин тўп” учун 30 нафар номзод қаторига киритилмаганига муносабат билдирди. Португалиялик мутахассис бу қарорни кескин танқид қилди.
“Мен учун уларнинг рўйхатда йўқлиги — жаҳон миқёсидаги можаро. Афсуски, адолатсизликлар бўлиб туради. Педридек иқтидорли футболчи қандай қилиб рўйхатга кирмаганини тушунмайман”, — деди Деку El Món a RAC1 дастурида.
Рафинья ўтган мавсум барча мусобақаларда 33 та учрашувда майдонга тушиб, 21 та гол ва 8 та голли узатмага муаллифлик қилган. Педри эса 43 та ўйинда 2 та гол уриб, 12 та ассист қайд этган. Шунга қарамай, ҳар икки футболчи “Олтин тўп” учун якуний 30 таликдан жой олмади.
Маълумот учун, “Барселона” футболчиларидан Ламин Ямал ва Пау Кубарси 2026 йилги “Олтин тўп” номзодлари рўйхатига киритилган. Деку эса Ямални соврин учун асосий даъвогарлардан бири деб ҳисобламоқда.
