“Barselona”da Rafinya va Pedrining “Oltin to‘p” ro‘yxatiga kiritilmagani keskin tanqid qilindi
“Barselona” sport direktori Deku Rafinya va Pedrining 2026-yilgi “Oltin to‘p” uchun 30 nafar nomzod qatoriga kiritilmaganiga munosabat bildirdi. Portugaliyalik mutaxassis bu qarorni keskin tanqid qildi.
“Men uchun ularning ro‘yxatda yo‘qligi — jahon miqyosidagi mojaro. Afsuski, adolatsizliklar bo‘lib turadi. Pedridek iqtidorli futbolchi qanday qilib ro‘yxatga kirmaganini tushunmayman”, — dedi Deku El Món a RAC1 dasturida.
Rafinya o‘tgan mavsum barcha musobaqalarda 33 ta uchrashuvda maydonga tushib, 21 ta gol va 8 ta golli uzatmaga mualliflik qilgan. Pedri esa 43 ta o‘yinda 2 ta gol urib, 12 ta assist qayd etgan. Shunga qaramay, har ikki futbolchi “Oltin to‘p” uchun yakuniy 30 talikdan joy olmadi.
Ma’lumot uchun, “Barselona” futbolchilaridan Lamin Yamal va Pau Kubarsi 2026-yilgi “Oltin to‘p” nomzodlari ro‘yxatiga kiritilgan. Deku esa Yamalni sovrin uchun asosiy da’vogarlardan biri deb hisoblamoqda.
