“Барселона” Жоау Фелишни қайтариши мумкин
“Ал-Наср” ҳужумчиси Жоау Фелиш фаолиятини яна “Барселона”да давом эттиришни истамоқда. Португалиялик футболчи келаси ёзда Каталония клубига эркин агент сифатида қайтиш вариантини кўриб чиқмоқда. Бу ҳақда Diario Sport хабар бермоқда.
Манбага кўра, Фелиш “Ал-Наср” билан шартномасини узайтирмаслик ва келаси ёзда “Барселона”га бепул ўтишни режалаштирмоқда. Футболчининг агенти Жорже Мендеш ҳам унинг истаги ҳақида Каталония клуби раҳбариятига маълум қилган. Ҳозирча томонлар ўртасида расмий музокаралар бошланмаган.
26 ёшли ҳужумчи яқинда Европа футболига қайтиш ва яна Чемпионлар лигасида ўйнаш нияти борлигини очиқ айтганди. Фелиш “Барселона”даги даврини илиқ хотиралар билан эслаб, бу клубда тўп тепиш болаликдаги орзуси бўлганини таъкидлаган.
Маълумот учун, Жоау Фелиш 2023/24-йилги мавсумда “Барселона” сафида ижара асосида ўйнаган. У каталонияликлар сафида барча мусобақаларда 44 та учрашувда 10 та гол ва 6 та ассист қайд этган.
