“Барселона” янги марказий ҳужумчи топди
Испаниянинг “Барселона” клуби ҳужум чизиғини кучайтириш мақсадида Бельгиянинг “Брюгге” жамоаси ҳужумчиси Николо Трезольдини ўз сафига қўшиб олмоқчи. Каталонияликлар 22 ёшли футболчини келаси мавсум учун асосий трансфер мақсадларидан бири сифатида кўриб чиқмоқда. Бу ҳақда инсайдер Экрем Конур хабар бермоқда.
Манбага кўра, германиялик ҳужумчига Лондоннинг “Арсенал” клуби ҳам қизиқиш билдирмоқда. “Барселона” ёзги трансфер ойнасидаёқ Трезольдининг ўйинларини кузатган ва унинг ривожланишини назорат қилишда давом этмоқда. Ҳар икки клуб футболчини келаси ёзда сотиб олиш имкониятини ўрганмоқда.
Трезольди 2025 йил ёзида Германиянинг “Ганновер” клубидан “Брюгге”га трансфер қилинган. Унинг Бельгия клуби билан амалдаги шартномаси 2029 йилнинг июнигача мўлжалланган. Ҳозирча футболчининг трансфери бўйича расмий таклиф юборилгани ҳақида маълумот йўқ. Ҳужумчининг трансфер қиймати тахминан 35 миллион евродан баҳоланмоқда.
Маълумот учун, Николо Трезольди 2025/26 йилги мавсумда Бельгия чемпионатида 40 та учрашувда майдонга тушиб, 19 та гол урган ва 5 та голли узатмани амалга оширган. Шунингдек, у Германия ёшлар терма жамоаси сафида ҳам тўп суради.
