«Барселона» яна «Камп Ноу»ни тарк этиши мумкин — манба
Каталониянинг «Барселона» клуби янги том ўрнатиш ишлари сабабли яна вақтинча «Камп Ноу» стадионини тарк этиши мумкин. Бу ҳақда Diari ARA нашри хабар бермоқда.
2027 йилнинг ёзига режалаштирилган том қисмини монтаж қилиш жараёни кутилганидан кўпроқ вақт талаб этиши маълум бўлди. Дастлаб клуб раҳбарияти ушбу ишларини тўрт ярим ойда якунлашни режалаштирган эди, бироқ муҳандислар бу жараён етти ойгача давом этиши мумкинлигини таъкидламоқда. Ушбу муддат давомида арендада расмий учрашувларни ўтказишнинг иложи бўлмайди.
Клубнинг операцион директори Жоан Сентельлеснинг сўзларига кўра, «Барселона» стадионни таъмирлаш учун бўшатиш мақсадида 2026/2027 йилги мавсумнинг сўнгги учта турини ва келаси чемпионатнинг дастлабки учта ўйинини меҳмонда ўтказишни режалаштирмоқда.
Агар қурилиш ишлари чўзилиб кетса, жамоа вақтинча «Эстади Йохан Круифф»га кўчиб ўтиши ёки яна «Монжуик» стадионига қайтиши мумкин. Бироқ «Монжуик» варианти молиявий харажатлар сабабли номақбул ҳисобланади. «Эстади Йохан Круифф» аренаси эса ҳозирча Ла Лига талабларига (камидан 15 минг ўрин) жавоб бермайди. Шу сабабли клуб президенти Жоан Лапорта ушбу стадион сиғимини 6 мингдан 16 минггача ошириш имкониятини кўриб чиқмоқда, аммо бунга шаҳар маъмурларидан рухсат олиш талаб этилади.
Маълумот ўрнида таъкидлаш жоизки, яқинда янгилланган «Камп Ноу» қисман очилган эди — «Севилья»га қарши кечган учрашувни стадионда 60 мингга яқин томошабин бевосита кузатиб борди.
