«Барселона» Суперлигадан чиққани учун жаримадан қутулиб қолди
«Барселона» клуби Европа Суперлигаси лойиҳасини тарк этгани учун жарима санкцияларидан қутулиб қолишга муваффақ бўлди. Бунга каталонияликлар президенти Жоан Лапортанинг лойиҳа ташкилотчилари билан келишувга эришгани сабаб бўлган. Бу ҳақда Mundo Deportivo нашри хабар бермоқда.
Манбанинг маълумотига кўра, шанба куни, 7 февралда эълон қилинган «кўк-анорранглилар»нинг лойиҳадан расмий чиқиши жамоанинг УЕФА билан яқинлашиш жараёнини якунлайди ва ташкилотлараро муносабатларни нормаллаштиради.
Эслатиб ўтамиз, янги Европа футбол турнири ташкил этилиши ҳақидаги эълон 2021 йилда берилган эди. «Барселона» Суперлиганинг 12 та асосчи клубларидан бири сифатида иштирок этган.
Европа футбол ассотсиациялари иттифоқи (УЕФА) ушбу лойиҳани кескин танқид қилиб, унда қатнашган барча клублар ички, Европа ва жаҳон миқёсидаги бошқа мусобақалардан четлатилиши ҳақида огоҳлантирган эди.
