“Барселона” Рафинянинг Бразилия терма жамоасидаги такрорий жароҳатлари сабабини аниқламоқчи
“Барселона” раҳбарияти Рафиня Диас билан унинг Бразилия терма жамоасидаги такрорий мушак муаммолари юзасидан алоҳида суҳбат ўтказмоқчи. Mundo Deportivo журналисти Анхел Перес маълумотига кўра, каталонияликлар футболчининг сўнгги олти ой ичидаги учта жароҳати ҳам терма жамоа йиғинида ва ўнг сонининг бир хил қисмида юз берганига эътибор қаратмоқда.
Клубнинг тиббий ва жисмоний тайёргарлик бўлими Рафинядан Бразилия термасидаги машғулотлар, бадан қиздириш жараёни ва юкламалар ҳақида батафсил маълумот олмоқчи. “Барселона” бу жараёнларда такрорланаётган бирор ҳолат футболчининг мушак муаммоларига сабаб бўлаётган-бўлмаётганини аниқлашни режалаштирган.
Рафиня Бразилиянинг Австралияга қарши 4:2 ҳисобида якунланган ўртоқлик учрашувида ўнг сонидаги ноқулайлик сабаб танаффусда алмаштирилган эди. Кейинги текширувда мушакда кичик шиш аниқланган ва эҳтиёт чораси сифатида футболчи терма жамоа йиғинини муддатидан олдин тарк этиб, Барселонага қайтган.
Маълумот учун, бу Рафинянинг 2026 йилда Бразилия терма жамоаси сафида ўнг сонининг орқа қисмида юзага келган учинчи муаммоси бўлди. “Барселона” энди ушбу ҳолатлар ўртасида боғлиқлик бор-йўқлигини аниқлаб, келажакда такрорий жароҳатларнинг олдини олиш чораларини ишлаб чиқмоқчи.
