«Барселона» ПСЖнинг Ферран Торрес бўйича таклифини рад этди
ПСЖ «Барселона» ҳужумчиси Ферран Торресни трансфер қилиш учун расмий таклиф билан чиққан. Mundo Deportivo маълумотига кўра, Париж клуби 26 ёшли футболчи учун 40 миллион евро миқдорида кафолатланган сумма таклиф қилган. «Барселона» эса ушбу таклифни рад этган.
Аввалроқ таниқли инсайдер Фабрицио Романо ПСЖ Торрес учун 50 миллион евро таклиф қилгани ҳақида хабар берган эди. Бироқ Mundo Deportivo’нинг «Барселона»даги манбалари бу маълумотни инкор этиб, парижликларнинг ҳақиқий таклифи 40 миллион евро бўлганини маълум қилган.
Каталония клуби Ферран Торресни сотишга қарши эмас, бироқ футболчи учун бундан юқорироқ сумма олишни истамоқда. Шу сабаб ПСЖнинг ҳозирги таклифи клуб раҳбариятини қониқтирмаган. Музокаралар давом этиши ва француз клуби яхшиланган таклиф билан чиқиши мумкин.
Ферран Торреснинг «Барселона» билан амалдаги шартномаси 2027 йилнинг ёзига қадар мўлжалланган. Шунингдек, испаниялик ҳужумчи жорий йилнинг июль ойида Жаҳон чемпионати финалида ғалаба голига муаллифлик қилган.
