“Барселона” Месси билан хайрлашув учрашувидан сўнг унга мурожаат қилди
“Барселона” клуби Лионел Мессининг Аргентина терма жамоасидаги фаолиятини якунлаганига муносабат билдирди. Каталония клуби собиқ футболчисини миллий жамоадаги тарихий фаолияти билан табриклади. Бу ҳақда “Барселона” расмий сайти хабар бермоқда.
Манбага кўра, клуб Месси билан боғлиқ эсда қоларли лаҳзаларни эслаб, унинг Пекин Олимпиадасидаги олтин медалидан тортиб Аргентина билан эришган бошқа ютуқларигача бўлган йўлини алоҳида таъкидлади. “Барселона” Мессининг Аргентина футболидаги мероси абадий қолишини қайд этди.
Месси Аргентина терма жамоасидаги сўнгги учрашувини Бенинга қарши ўтказди. Аргентина 3:0 ҳисобида ғалаба қозонган баҳсда 39 ёшли футболчи бир гол урди. У терма жамоадаги фаолиятини 208 та учрашув ва 126 та гол билан якунлади.
Маълумот учун, Лионел Месси “Барселона” сафида 778 та расмий учрашув ўтказиб, 672 та гол урган ва клуб билан 35 та соврин қўлга киритган. У клуб тарихида энг кўп гол урган, энг кўп ўйин ўтказган ва энг кўп соврин ютган футболчи ҳисобланади.
