“Барселона” Марк Бернални 500 млн евролик банд билан сақлаб қолади
“Барселона” ярим ҳимоячиси Марк Бернал клуб билан шартномасини 2031-йилгача узайтиришга яқин турибди. Янги келишувда футболчининг товон пули 500 млн евро миқдорида сақлаб қолинади. Томонлар асосий шартлар бўйича келишиб олган, битимни расмийлаштириш учун фақат якуний ҳужжатлар қолган. Бу ҳақда Mundo Deportivo хабар бермоқда.
Манбага кўра, Берналнинг амалдаги шартномаси 2029-йилгача мўлжалланган бўлиб, янги келишув унинг “Барселона”даги фаолиятини яна икки йилга узайтиради. Клуб 19 ёшли футболчининг салоҳиятига юқори баҳо бермоқда ва 500 млн евролик товон пулини янада оширишга зарурат кўрмаган.
“Ла Масия” тарбияланувчиси оғир тизза жароҳатидан тикланганидан сўнг асосий жамоада яна ўз ўрнини мустаҳкамлашга муваффақ бўлди. Жорий мавсумда ярим ҳимояга Родри келиб қўшилганига қарамай, Бернал Ханси Флик режаларидаги истиқболли футболчилардан бири бўлиб қолмоқда. У сентябрдаги халқаро танаффус учун Испания U-21 терма жамоасига ҳам чақирилган.
Маълумот учун, “Барселона” Бернал билан 2025-йил сентябрида 2029-йилгача мўлжалланган шартнома имзолаган ва ўшанда ҳам унинг товон пулини 500 млн евро этиб белгилаган эди. Футболчи 2024-йил августида тиззасидан жиддий жароҳат олиб, узоқ муддат майдондан ташқарида қолган. У 2025-йил сентябрида сафга қайтган.
