«Барселона» Эл-Класикода махсус формада майдонга тушади
Испаниянинг «Барселона» клуби «Реал Мадрид»га қарши навбатдаги Эл-Класикода махсус дизайндаги формада майдонга тушишини эълон қилди. Каталонияликлар бу сафар америкалик рэпер ва дизайнер Tyler, The Creator билан ҳамкорликда тайёрланган либосдан фойдаланади. Футболчиларнинг кўкрак қисмида одатий Spotify логотипи ўрнига санъаткорга тегишли «GOLF WANG» брендининг «GOLF» ёзуви жойлаштирилади. Бу ҳақда «Барселона» расмий сайти хабар бермоқда.
Манбага кўра, янги форма клубнинг Spotify билан ҳамкорлиги доирасида ишлаб чиқилган. Мазкур лойиҳа футбол, мусиқа ва мода оламини бирлаштиришга қаратилган бўлиб, Tyler, The Creator илк бор ушбу ҳамкорлик доирасидаги реклама кампаниясининг барча ижодий жараёнларини тўлиқ назорат қилиш имкониятига эга бўлган. Ҳамкорлик доирасида махсус футболкалардан ташқари, спорт кийимлари, курткалар ва турли аксессуарлар коллекцияси ҳам тақдим этилган.
«Барселона»нинг тижорат масалалари бўйича вице-президенти Joan Soler ушбу ҳамкорлик клубнинг халқаро миқёсдаги машҳурлигини ошириш ва янги аудиторияни жалб қилишга хизмат қилишини таъкидлади. Унинг сўзларига кўра, Spotify билан биргаликда амалга оширилаётган бундай лойиҳалар футбол ва мусиқа ўртасидаги алоқаларни янада мустаҳкамламоқда. Шунингдек, 24 октябрь куни Барселонада мусиқа, футбол ва модани бирлаштирувчи «Copa De Golf» тадбири ташкил этилиши режалаштирилган.
Маълумот учун, «Барселона» ва «Реал Мадрид» ўртасидаги Ла Лиганинг 10-тур учрашуви 25 октябрь куни «Spotify Camp Nou» стадионида бўлиб ўтади. Махсус форма дастлаб 24 октябрь куни «Барселона» аёллар жамоасининг «Гранада»га қарши баҳсида фойдаланилади. Клуб янги либоснинг 1 899 дона чекланган нусхасини сотувга чиқарган. Аввалроқ каталонияликлар Drake, Rosalía, Coldplay, Travis Scott, Ed Sheeran ва Olivia Rodrigo каби машҳур санъаткорларнинг логотиплари туширилган формаларда ҳам майдонга тушган эди.
