“Барселона” Де Йонгнинг ўрнига Марокаш терма жамоаси футболчисини кўрмоқда
“Барселона” ярим ҳимоячиси Френки де Йонгнинг жароҳатидан сўнг унинг ўрнини босадиган вариантларни излашни давом эттирмоқда. El Chiringuito хабарига кўра, Каталония клуби Марокаш терма жамоаси ярим ҳимоячиси Билол Эл Ҳаннусни асосий номзодлардан бири сифатида кўрмоқда.
Манбага кўра, клуб спорт директори Деко ва мураббий Ханси Флик 21 ёшли футболчининг ўйин услубини Де Йонгнинг фазилатларига яқин деб ҳисобламоқда. Эл Ҳаннус тўп билан муомала қилиш, ҳужумни бошлаш ва марказда ўйинни бошқариш борасидаги сифатлари билан “Барселона” эътиборини тортган.
Айни пайтда “Барселона” трансфер бозоридаги молиявий имкониятларини ҳам ҳисобга олмоқда. Шу сабабли клуб футболчи бўйича якуний қарор қабул қилишдан олдин барча вариантларни синчковлик билан ўрганмоқда. Ҳозирча Марокаш терма жамоаси футболчиси бўйича расмий таклиф юборилгани ҳақида маълумот йўқ.
Қайд этилишича, Френки де Йонгнинг узоқ муддатга сафдан чиққанлиги сабаб “Барселона” марказий ярим ҳимоя чизиғини кучайтиришни ёзги трансфер ойнасининг устувор вазифаларидан бири сифатида белгилаган.
