«Барселона» Алваресни сотиб олишнинг янги усулини ўйлаб топди
«Барселона» «Атлетико» ҳужумчиси Хулиан Алваресни қўлга киритишнинг янги вариантини кўриб чиқмоқда. Каталония клуби аргентиналик футболчи учун пул билан бирга ўз футболчиларидан бирини таклиф қилиш имкониятини ўрганмоқда. Бу ҳақда Fichajes нашри хабар бермоқда.
Манбага кўра, «Барселона» эҳтимолий келишувга Френки де Йонг, Алехандро Бальде ёки Дани Ольмодан бирини қўшиши мумкин. Шу орқали каталонияликлар «Атлетико» талаб қилаётган суммани камайтиришга умид қилмоқда. Ҳозирча клублар ўртасида бу формула бўйича расмий музокаралар бошланмаган.
«Барселона» Алваресни ёзги трансфер ойнасида ҳам сотиб олишга уринган, бироқ мадридликлар етакчи футболчисини қўйиб юборишни истамаган. Каталония клуби спорт директори Деко сентябрь ойида «Атлетико» футболчини сотишга рози бўлмаганини тасдиқлаган эди.
Маълумот учун, 24 сентябрь куни Деко Алварес масаласини «ўтмишда қолган» деб атаб, клуб бошқа вариантларга эътибор қаратаётганини айтган. Шу сабаб Fichajes тарқатган янги маълумот ҳозирча трансфер миш-миши сифатида баҳоланиши керак.
