«Барселона» Алварес трансфери учун Ферран Торресни ҳам қўшиб бериши мумкин
Каталониянинг «Барселона» клуби Мадриднинг «Атлетико» ҳужумчиси ва Аргентина терма жамоаси сафида жаҳон чемпиони бўлган Хулиан Алварес билан ҳужум чизиғини кучайтиришни мақсад қилган.
Cadena Ser нашрининг «кўк-анорранглилар» президенти Жоан Лапорта атрофидаги манбаларга таянилиб хабар берилишича, мазкур трансфер келишувига ҳужумчи Ферран Торрес ҳам киритилиши мумкин.
Манба берган маълумотларга кўра, «Барселона»нинг режаси поляк тажрибали ҳужумчи Роберт Левандовски билан шартномани яна бир йилга узайтиришдан иборат. Бунда Левандовскига иш ҳақини камайтириш ва захира ўйинчиси ролига рози бўлиш таклиф этилади.
Ўз навбатида, Алварес жамоанинг асосий марказий ҳужумчисига айланиши ҳамда Рафинья ва Ламин Ямал билан биргаликда ҳужум учлигини ташкил этиши кутилмоқда. Хабарда айтилишича, клуб раҳбарияти ушбу трансфер суммаcи 100 миллион еврони ошмаслигига ишонч билдираётгани қайд этилган.
