“Байер” ПСЖ юлдузининг акасини сотиб олмоқда
Леверкузеннинг “Байер” клуби “Страсбург” ҳимоячиси Гела Дуени трансфер қилиш бўйича келишувга эришди. 23 ёшли футболчининг трансфер қиймати бонуслар билан бирга 37,5 миллион еврога етади. Бу ҳақда инсайдер Fabrizio Romano маълум қилди.
Манбага кўра, “Байер” ва “Страсбург” ўртасидаги музокаралар муваффақиятли якунланган. Гела Дуе ҳам Германия клубига ўтишга розилик билдирган ва трансферни якунлаш учун тиббий кўрикдан ўтиши кутилмоқда.
Кот-д’Ивуар терма жамоаси ҳимоячиси 2024 йилдан буён “Страсбург” шарафини ҳимоя қилиб келмоқда. Ўтган мавсумда у барча мусобақаларда 34 та учрашувда майдонга тушиб, 2 та гол урди ва 7 та голли узатма амалга оширди.
Маълумот учун, Гела Дуе ПСЖ ярим ҳимоячиси Дезире Дуенинг акаси ҳисобланади. “Страсбург” уни 2024 йилда “Ренн”дан 6 миллион еврога сотиб олган эди.
