Австралия футболида ноодатий қоида жорий этилди
Австралиядаги иккинчи даражали миллий мусобақа — Australian Championshipда янги формат синовдан ўтказилади. Турнирнинг гуруҳ босқичида учрашувнинг асосий вақти дуранг билан якунланса, ғолиб пенальтилар серияси орқали аниқланади. Бу ҳақда Goal нашри хабар бермоқда.
Манбага кўра, пенальтилар сериясида ғалаба қозонган жамоага 2 очко, мағлуб бўлган томонга эса 1 очко берилади. Мазкур қоида фақат турнирнинг гуруҳ босқичида амал қилади.
Янги тизимдан кўзланган мақсад дуранг билан якунланадиган учрашувларга қўшимча рақобат ва қизиқиш олиб киришдан иборат. Шу тариқа, 90 дақиқадан сўнг ҳисоб тенг бўлса ҳам, жамоалар ўртасида ғолиб аниқланади ва очколар натижага қараб тақсимланади.
Маълумот учун, Австралияда шунга ўхшаш тизим 1994/95-йилги мавсумда ҳам қўлланган. 1973-йилда СССР чемпионатида ҳам дуранглардан кейин пенальтилар серияси жорий этилган, бироқ кейинчалик бу тажриба бекор қилинган.
