«Атлетико» тез орада Лукман трансферига эълон қилади
Мадриднинг «Атлетико» клуби ўзининг расмий сайти орқали «Аталанта» ҳужумчиси Адемола Лукманнинг трансфери бўйича тўлиқ келишувга эришилганини эълон қилди. Нигериялик форвард айни дамда Мадридда бўлиб турибди.
Клуб берган маълумотга кўра, футболчи тиббий кўрикдан ўтиш ва янги шартнома имзолаш учун Испания пойтахтига етиб келган. Машҳур инсайдер Фабрицио Романонинг хабар беришича, ушбу трансфер «матрасчилар»га 35 миллион еврога тушган. Шунингдек, келишувда яна 5 миллион евро миқдоридаги бонуслар ҳам кўзда тутилган.
28 ёшли Лукман 2022 йилнинг ёзидан буён Бергамо клуби сафида ёрқин ўйинлар намойиш этиб келаётган эди. У «Аталанта» либосида жами 137 та учрашувда майдонга тушиб, 55 та гол ва 27 та голли узатмани амалга оширди.
Эслатиб ўтамиз, 2024 йил Лукман фаолиятидаги энг муваффақиятли мавсум бўлди. У «Аталанта» билан Европа Лигасида зафар қучди, Африкадаги энг яхши футболчи деб топилди ҳамда «Олтин тўп» сўровномасида 14-ўринни эгаллади.
