«Атлетико» ва «Арсенал» Альварес ҳамда Дёкерешнинг трансферлари бўйича келишувга эришди — El Chiringuito
Лондоннинг «Арсенал» клуби Мадриднинг «Атлетико» клуби билан аргентиналик ҳужумчи Хулиан Альвареснинг трансфери борасида келишувга эришди. Бу ҳақда El Chiringuito TV X ижтимоий тармоғида хабар бермоқда.
Манбанинг хабарига кўра, трансфер нархи 50 миллион еврони ташкил этади. Шунингдек, келишувга «канонирлар»нинг швециялик ҳужумчиси Виктор Дёкереш ҳам киритилиши керак, у Мадрид клубига йўл олади.
Таъкидланишича, «Атлетико» бош директори Хиль Марин «Барселона» президенти Жоан Лапортага қўнғироқ қилиб, аргентиналик форвард «кўк-анорранглилар»га сотилмаслигини шахсан маълум қилган.
Альварес 26 ёшда. Ўтган клуб мавсумида аргентиналик форвард барча турнирларда 49 та ўйинда майдонга тушиб, 20 та гол урди ва тўққизта голли узатмани амалга оширди. Унинг «қизил-оқлар» билан шартномаси 2030 йилнинг ёзигача мўлжалланган.
Transfermarkt интернет-портали маълумотларига кўра, футболчининг тахминий нархи 100 миллион еврони ташкил этади.
