“Атлетико” стадионидаги дўконда Хулиан Альвареснинг футболкалари сотувда йўқ
Мадриднинг “Атлетико” клуби стадиони ҳудудидаги расмий дўконда айни пайтда Хулиан Альварес фамилияси туширилган футболкалар сотилмаяпти. The Touchline маълумотига кўра, бу ҳолат аргентиналик ҳужумчининг келажаги атрофидаги сўнгги воқеалар фонида эътибор тортган.
Альварес ёзги трансфер ойнасида “Атлетико”ни тарк этиш имкониятини кўриб чиққан. Ҳужумчи “Барселона”га ўтишни истаган, бироқ Мадрид клуби уни каталонияликларга сотишга рози бўлмаган. “Арсенал” варианти эса футболчининг ўзи томонидан рад этилган.
Шунга қарамай, 26 ёшли футболчи “Атлетико” сафида қолмоқда. Бош мураббий Диего Симеоне Альваресни 5-сентябрь куни “Атлетик”ка қарши бўлиб ўтадиган учрашувда майдонга туширишни режалаштираётганини билдирган.
Маълумот учун, Альвареснинг футболкаси “Атлетико”нинг расмий онлайн-дўконида ҳамон мавжуд: мухлислар янги мавсум формасини унинг 19-рақами ва фамилияси билан буюртма қилишлари мумкин. Демак, ҳозирги ҳолат стадиондаги жисмоний дўконга тегишли.
