«Атлетико» Гризманн ўрнига «Боруссия Дортмунд» футболчисини олиб келмоқчи
Мадриднинг «Атлетико» клуби жорий ёзда жамоани тарк этадиган ҳужумчи Антуан Гризманннинг ўрнини босувчи футболчини аниқлаб олди. Маълум бўлишича, франциялик футболчи аллақачон «Орландо Сити» билан шартнома имзолаб улгурган. «Матрасчилар» унинг ўрнига Дортмунднинг «Боруссия» клуби яримҳимоячиси Юлиан Брандт трансферини амалга оширишни режалаштирмоқда.
Германиялик футболчи шу ёзда «асаларилар» сафини эркин агент сифатида тарк этади, бу эса Мадрид клубига уни текинга қўлга киритиш имконини беради. Бу ҳақда Marca нашри хабар бермоқда.
Юлиан Брандт 2019 йилда «Байер»дан «Боруссия Дортмунд» сафига 25 миллион евро эвазига ўтган эди. Жорий мавсумда ярим ҳимоячи барча турнирларда 37 та ўйин ўтказиб, 11 та гол урди ва 3 та голли узатмани амалга оширди. Transfermarkt портали футболчини 20 миллион еврога баҳоламоқда.
