Аспиликуэта фаолиятини якунлашини эълон қилди
«Севилья» ҳимоячиси Сесар Аспиликуэта жорий мавсум якунланганидан сўнг профессионал футболчилик фаолиятини тугатишини маълум қилди.
36 ёшли испаниялик футболчи ўз мурожаатида бу қарор унинг ҳаётидаги янги босқич бошланиши эканини таъкидлади:
«Бугун сизларга шуни маълум қилмоқчиманки, ушбу мавсум менинг профессионал футболчи сифатидаги сўнгги мавсумим бўлади. Орзумни рўёбга чиқариб ўтган шунча йиллардан сўнг, ҳаётимда янги саҳифа очиш вақти келганини ҳис қиляпман.
Ростини айтсам, бу онга тайёр бўлган бўлсам-да, бу сўзларни ёзиш мен учун осон кечмади. 20 мавсум давомида кўплаб инсонлар менинг фаолиятимда муҳим ўрин тутди. Болалигимда Памплонада синфдошларим билан футбол ўйнай бошлаганимда, мени қандай ажойиб йўл кутаётганини тасаввур ҳам қилмаганман.
Ҳар бир лаҳза учун миннатдорман: ғалабалар, оғир мағлубиятлар, синовлар ва энг муҳими — йўлимда учратган инсонлар ва орттирган дўстликлар учун.
Жамоадошларимга, мураббийларимга ва мен ўйнаган барча клублар ходимларига — ҳар куни шахс ва футболчи сифатида ўсишимга ёрдам берганингиз учун раҳмат. «Осасуна», «Марсель», «Челси», «Атлетико», «Севилья» либосини кийиш ва мамлакатимни энг йирик ареналарда ҳимоя қилиш мен учун катта шараф бўлди. Ҳар бир лаҳза мен учун жуда қадрли эди…»
Аспиликуэта ушбу баёнотни ижтимоий тармоқда эълон қилди.
