Ашраф Ҳакими Чемпионлар Лигаси тарихида янги рекорд ўрнатди
Франциянинг «ПСЖ» клуби ҳимоячиси Ашраф Ҳакими Чемпионлар Лигаси тарихида янги рекорд ўрнатди. Squawka нашрининг хабар беришича, у турнир тарихида икки хил мавсумда 5 та ва ундан ортиқ голли узатмани амалга оширган илк ҳимоячига айланди.
Марокашлик футболчи ушбу натижага «Челси»га қарши кечган жавоб учрашувининг 15-дақиқасида Бредли Барколяга голли пас бериш орқали эришди. Ўша вазиятда парижликлар ҳисобда 2:0 кўринишида олдинга чиқиб олишган эди. Якунда «ПСЖ» 3:0 ҳисобида ғалаба қозонди.
Жорий мавсумда 27 ёшли ҳимоячи барча мусобақаларда 23 та ўйинда майдонга тушиб, ўз ҳисобига 3 та гол ва 5 та самарали узатмани ёздириб қўйди. Футболчининг Франция гранди билан амалдаги шартномаси 2029 йил 30 июнгача мўлжалланган. Transfermarkt портали маълумотларига кўра, Ҳакимининг айни дамдаги бозор қиймати 80 миллион еврони ташкил этади.
Эслатиб ўтамиз, «ПСЖ» икки ўйин натижасига кўра (8:2) чорак финалга йўлланма олди ва ўз унвонини ҳимоя қилишда давом этмоқда.
