АҚШга киритилмаган сомалилик ҳакам ЖЧ-2026 учун тўлиқ гонорар олади
2026 йилги Жаҳон чемпионатида ҳакамлик қилиш учун Америка Қўшма Штатларига киришига рухсат берилмаган сомалилик ҳакам Омар Абдулқодир Артан турнирдаги иштироки учун тўлиқ гонорарни қўлга киритади. Бу ҳақда BBC нашри хабар бермоқда.
Манбанинг маълум қилишича, Артаннинг Жаҳон чемпионатида қатнашолмаётганига қарамай, ФИФА унга белгиланган маошни тўлаб бериш мажбуриятини олган. Ҳакамлар чемпионатда ҳакамлик учун аниқ қанча миқдорда гонорар олишларини билишмайди, чунки барча тўловлар турнир якунлангандан кейин амалга оширилади.
2025 йилда Африка Футбол Конфедерацияси (CAF) талқинига кўра йилнинг энг яхши футбол ҳаками деб топилган Омар Артан жорий йилнинг 12 август куни Австриянинг Зальцбург шаҳрида бўлиб ўтадиган «Пари Сен-Жермен» ва «Астон Вилла» жамоалари ўртасидаги УЕФА Суперкубоги баҳсини бошқариш учун таклиф олган.
Эслатиб ўтамиз, аввалроқ Омар Артаннинг АҚШга киришига рухсат берилмаган эди. Ушбу воқеа Майами халқаро аэропортида содир бўлган. Артан мамлакатга дипломатик паспорт билан етиб келган бўлса-да, номаълум сабабларга кўра унинг кириши тақиқланган. Натижада ҳакам Туркияга қайтариб юборилган.