АҚШга киритилмаган сомалилик ҳакам ватанида қаҳрамонга айланди
2026 йилги Жаҳон чемпионатида ҳакамлик қилиши керак бўлган сомалилик ҳакам Омар Абдулқодир Артан АҚШга киритилмаганидан сўнг, ўз ватанига қайтиб келди. Могадишу аэропортида уни кўплаб мухлислар ва расмийлар тантанали тарзда кутиб олишди.
Агар Артан турнирда ишлаганида, у Жаҳон чемпионатлари тарихидаги илк сомалилик ҳакамга айланиши мумкин эди. Африкада 2025 йилнинг энг яхши ҳаками деб топилган мутахассис ватанида журналистлар билан бўлиб ўтган суҳбатда содир бўлган воқеа учун афсусда эканини, бироқ тушкунликка тушмаслигини ва ФИФА кўрсатган ёрдами учун миннатдор эканини билдирди.
ФИФА вакили Омар Артаннинг турнир олди йиғинларида ҳам, чемпионат ўйинларида ҳам қатнашолмаслигини расман тасдиқлади. Сомали ҳукумати АҚШ ва ФИФА билан музокаралар ўтказган бўлса-да, ижобий натижага эришолмаганини маълум қилди.
АҚШ божхона ва чегара хизмати маълум қилишича, Истанбулдан Майами аэропортига учиб келган Артан текширувдан ўта олмаган ва кейинчалик у «миллий хавфсизликка таҳдид солиши мумкин» деган хулоса билан ортга қайтарилган.
Қизиғи шундаки, Артанга АҚШ визаси турнир бошланишидан бир ҳафта олдин берилган эди. Экспертлар буни АҚШ президенти Доналд Трамп маъмурияти томонидан ўтган йили рўйхатига Сомали ҳам киритилган 12 та давлат фуқаролари учун жорий этилган саёҳат чекловлари билан боғлашмоқда.
