Артета жароҳат олган Троссар ва Калафёри ҳам гапирди
Лондоннинг «Арсенал» клуби бош мураббийи Микел Артета жамоа футболчилари Леандро Троссар ва Риккардо Калафёрининг Англия Кубоги доирасидаги баҳсда олган жароҳатлари борасида маълумот берди.
Англия Кубогининг бешинчи босқичи доирасида кечган «Менсфилд Таун»га қарши учрашувда (2:1) бельгиялик ҳужумчи 38-дақиқада майдонни тарк этишга мажбур бўлган бўлса, италиялик ҳимоячи 76-дақиқада алмаштирилди.
«Ҳар икки футболчида соғлиғи билан боғлиқ кичик муаммолар юзага келди ва улар ўйинни давом эттиришда ноқулайлик сезишди. Айниқса, бугунги об-ҳаво ва майдон шароитида бундай ҳолат юза бериши мумкинлигини тахмин қилган эдик. Шу сабабли, биз уларни захирага олишга қарор қилдик», — дея Артетанинг сўзларини келтирмоқда клуб расмий сайти.
Эслатиб ўтамиз, мусобақанинг 1/4 финал босқичига қуръа ташлаш маросими 9 март куни бўлиб ўтади. Англия Кубогининг амалдаги ғолиби «Кристал Пэлас» ҳисобланиб, улар ўтган йилги финалда «Манчестер Сити»ни 1:0 ҳисобида мағлуб этишган эди.
