Артета: «Гёкереш «Спортинг»га қарши ўйинни интиқлик билан кутяпти»
Лондоннинг «Арсенал» клуби бош мураббийи Микел Артета Европа Чемпионлар Лигасининг чорак финали доирасида Лиссабоннинг «Спортинг» жамоасига қарши бўлиб ўтадиган учрашув олдидан ўз фикрлари билан ўртоқлашди.
Жамоаларнинг дастлабки тўқнашуви бугун, 7 апрел куни Лиссабондаги «Жозе Алваладе» стадионида бўлиб ўтади.
«Спортинг»нинг ютуқларига, айниқса, ўз майдонидаги натижаларига ва ушбу мавсумда қайси жамоаларни мағлуб этганига эътибор қаратсак, бўлажак ўйин қанчалик қийин кечишини тушуниб етамиз. Айнан шу омил биздаги ғалаба қозониш иштиёқини янада кучайтирмоқда», — дея мураббийнинг сўзларини келтирмоқда УЕФА расмий сайти.
Шунингдек, Артета собиқ жамоасига қарши майдонга тушадиган ҳужумчи Виктор Гёкереш ҳақида ҳам тўхталиб ўтди:
«Ўйлайманки, Виктор ушбу учрашувни интиқлик билан кутмоқда. У ҳаяжонда ва «Спортинг»да ўтказган вақтлари учун клубдан жуда миннатдор. Буни унинг клуб ходимлари, футболчилар ва жамоа атрофидаги инсонлар ҳақида гапираётганидан ҳам билиш мумкин. Лиссабонда орттирган тажрибаси унинг фаолиятидаги энг муҳим босқичлардан бири бўлган».
Эслатиб ўтамиз, Виктор Гёкереш 2025 йилнинг июль ойи охирида «Спортинг»дан «Арсенал» сафига кўчиб ўтган эди. Ҳужумчи 2023 йилдан 2025 йилга қадар Португалия клуби шарафини ҳимоя қилган.
