Артета бошчилигидаги «Арсенал» Керрик раҳбарлигидаги «МЮ»га қарши ўйинларда ноёб антирекорд қайд этди
Микел Артета бошчилигидаги Лондоннинг «Арсенал» клуби икки ва ундан ортиқ гол урган ўйинда бор-йўғи икки марта мағлуб бўлган. Ҳар икки ҳолатда ҳам «канончилар» Майкл Керрик раҳбарлигидаги «Манчестер Юнайтед»га имкониятни бой берган.
«Арсенал»нинг «Юнайтед»дан илк мағлубияти 2021 йил декабрь ойида 2:3 ҳисобида қайд этилган бўлса, иккинчиси 2026 йил январига тўғри келди. Бу ҳақда Opta X ижтимоий тармоғида хабар берилди.
Керрик Рубен Аморим клубни тарк этганидан сўнг янги календар йилнинг илк ойида «Манчестер Юнайтед» бош мураббийи этиб тайинланган. Артета эса 2019 йилдан буён «Арсенал»ни бошқариб келмоқда. Аввалроқ испан мутахассиси «Манчестер Сити»да Хосеп Гвардиоланинг ёрдамчиси сифатида фаолият юритган.
Жорий мавсумда «Арсенал» Англия чемпионати турнир жадвалида 50 очко билан етакчилик қилмоқда. «Манчестер Юнайтед» эса 38 очко билан тўртинчи ўринни эгаллаб турибди.
