«Арсенал» Винисиус трансферига ишонмоқда
«Арсенал» раҳбарияти «Реал» вингери Винисиус Жуниорни ўз сафига қўшиб олиш имкониятига ишонмоқда. Бу ҳақда AS нашри хабар тарқатди.
Манба маълумотига кўра, «тўпчилар»нинг спорт директори Андреа Берта клуб ичидаги кўплаб инсонларга, жумладан футболчиларга ҳам ушбу трансфер муваффақиятли якунланишига ишонаётганини билдирган.
Шунингдек, бош мураббий Микель Артета Винисиус билан суҳбат ўтказиб, уни ўз лойиҳасида қандай ўринда кўраётганини тушунтирган. Бразилиялик ҳужумчи эса, агар «Реал»ни тарк этишга қарор қилса, «Арсенал»ни ўзи учун муносиб вариант деб ҳисобламоқда.
Хабарда айтилишича, Мадрид клуби раҳбарияти ҳам «Арсенал»нинг Винисиусга жиддий қизиқиши ҳақида хабардор.
Шу билан бирга, «Реал» раҳбарияти Винисиус билан шартномани фақат клуб шартлари асосида узайтиришга тайёр. Футболчига жамоада ҳеч бир ўйинчи клуб манфаатларидан устун бўла олмаслиги очиқ айтилган.
Аввалроқ «Реал» Винисиус Жуниорга яхшиланган шартнома таклиф қилгани, унда футболчининг жамоа ва клуб лойиҳасидаги муҳим ўрни инобатга олингани ҳақида хабарлар тарқалган эди.
