“Арсенал” ҳужум чизиғини икки футболчи билан кучайтириши мумкин
“Арсенал” ҳужум чизиғини кучайтириш мақсадида “Борнмут” форварди Эли Жуниор Крупи ҳамда “Брентфорд” вингери Кевин Шадени кузатмоқда. Лондон клуби ҳар икки футболчини келгуси трансфер ойнаси учун эҳтимолий вариант сифатида кўриб чиқмоқда. Бу ҳақда Football London нашри хабар бермоқда.
Манбага кўра, “Арсенал” айниқса 20 ёшли Крупига жиддий қизиқиш билдирмоқда. Франциялик ҳужумчи ўтган мавсум Премьер-лигада 13 та гол уриб, бир қатор топ-клублар эътиборини тортган. “Борнмут” эса ўз футболчисини фақат жуда катта таклиф тушган тақдирдагина қўйиб юбориши мумкин.
Кевин Шаде ҳам “канонирлар”нинг эҳтимолий номзодлари қаторидан жой олган. 24 ёшли германиялик футболчи тезлиги ва ҳужумнинг бир нечта позициясида ҳаракат қила олиши билан қадрланмоқда. “Брентфорд” ҳам уни арзон нархда сотишни режалаштирмаяпти.
Маълумот учун, айрим манбаларда Крупи ва Шаде трансферлари “Арсенал”га жами 190 миллион евродан ортиқ тушиши мумкинлиги айтилмоқда. Бироқ ҳозирча на расмий таклиф, на клублар ўртасидаги музокаралар тасдиқланган.
