«Arsenal» трансфер бозорида энг кўп зарар кўрган клубга айланди
Халқаро спорт тадқиқотлари маркази (CIES) ўзининг расмий сайтида сўнгги икки трансфер мавсуми якунлари бўйича клубларнинг молиявий баланси (харжат ва тушум фарқи) акс этган антирейтингни эълон қилди. Мазкур рўйхатда Лондоннинг «Arsenal» клуби мутлақ «пешқадам»га айланди. «Канонирлар»нинг трансфер баланси –362 миллион еврони ташкил этмоқда.
Рейтингнинг юқори қисмида асосан Англия Премьер-лигаси вакиллари ўрин олган бўлса-да, кучли ўнликда Саудия Арабистонининг «Al Hilol» клуби ҳам борлиги эътиборга молик.
Сўнгги икки трансфер ойнаси давомида энг кўп зарар кўрган жамоалар рўйхати қуйидагича шаклланди: Биринчи ўринда «Arsenal» (–362 млн евро), иккинчи поғонада «Liverpool» (–244 млн евро) ва учинчи ўринда «Manchester City» (–208 млн евро) қайд этилган.
Кучли бешликни Саудия Арабистонининг «AlHilol» (–195 млн евро) ҳамда кутилмаганда Англиянинг «Sunderland» (–191 млн евро) клублари якунлаб берган. Рўйхатнинг кейинги ўринларидан «Manchester United» (–187 млн евро), «Tottenham» (–177 млн евро), Мадриднинг «Atletico» (–162 млн евро) ва «Real» (–154 млн евро) клублари жой олди. Антирейтингнинг ўнинчи поғонасини эса «Everton» (–148 млн евро) банд этган.
Молиявий томондан энг самарали сиёсат юритган жамоалар орасида Франциянинг «Monaco» клуби яққол ажралиб турибди. Мазкур клуб сўнгги икки трансфер мавсумида +149 миллион евро фойда кўрган. Шунингдек, Англиянинг «Wolverhampton» (+98 млн евро) ва «Southampton» (+89 млн евро) жамоалари ҳам трансфер бозорида ижобий натижа қайд этганлар қаторида эътироф этилди.
