«Арсенал» раҳбарияти Артетага ультиматум қўйди
Лондоннинг «Арсенал» клуби раҳбарияти бош мураббий Микел Артетага бу мавсумда оқланиши учун бошқа баҳонаси қолмади, деб ҳисобламоқда. Трансфер бозорида тўлиқ қўллаб-қувватлашдан сўнг, жамоа олдига аниқ ва минимал вазифа қўйилган: Премьер-лига чемпионлигини қўлга киритиш. Бу ҳақда The Touchline саҳифаси хабар бермоқда.
Айни пайтда «Арсенал» АПЛнинг 26 туридан сўнг 57 очко билан турнир жадвалида пешқадамлик қилмоқда. Иккинчи ўриндаги «Манчестер Сити» билан фарқ тўрт очкони ташкил этади.
Шунингдек, «канонирлар» УЕФА Чемпионлар Лигасининг гуруҳ босқичини саккизта ўйинда саккизта ғалаба билан биринчи ўринда якунлади. Жамоа Англия Кубогида ҳам ўз юришини давом эттирмоқда — 15 февраль куни клуб 1/16 финал босқичида «Уиган Атлетик»ка қарши майдонга тушади.
