«Arsenal» кетма-кет иккинчи мавсум Чемпионлар Лигаси яримфиналига чиқди
Лондоннинг «Arsenal» клуби UEFA Чемпионлар Лигаси чорак финалида икки ўйин натижасига кўра Лиссабоннинг «Sporting» жамоасидан устун келди (1:0, 0:0). Шу тариқа, «тўпчилар» кетма-кет иккинчи мавсум Қадимги қитъанинг энг нуфузли клублараро турнири яримфиналига йўлланма олди.
Мусобақанинг ўтган мавсумида Mikel Arteta шогирдлари айнан шу босқичда Мадриднинг «Real» клубини мағлуб этишган эди (3:0, 2:1), бироқ яримфиналда якунда турнир ғолибига айланган «Paris Saint-Germain»га имкониятни бой беришган (0:1, 1:2). Амалдаги Чемпионлар Лигасининг яримфиналида «Arsenal» Мадриднинг «Atletico» жамоасига қарши баҳс олиб боради.
Жорий мавсумдаги финал учрашуви Будапештдаги (Венгрия) «Pushkash Arena» стадионида бўлиб ўтади. Ҳал қилувчи баҳс 2026 йил 30 майга белгиланган. Эслатиб ўтамиз, Чемпионлар Лигасининг амалдаги ғолиби Франциянинг «PSG» клуби ҳисобланади.
