«Арсенал» Хулиан Альварес трансферини тезроқ якунламоқчи
«Арсенал» «Атлетико» ҳужумчиси Хулиан Альварес трансферини имкони борича тезроқ якунлашни режалаштирмоқда. The Independent хабарига кўра, лондонликлар битимни мавсумолди йиғини бошланишидан олдин расмийлаштиришни мақсад қилган.
Манбага кўра, «тўпчилар» аргентиналик форвард учун 105 миллион евро тўлашга тайёр. Бироқ «Атлетико» ўз футболчисини камида 117 миллион еврога баҳоламоқда. «Арсенал» томонидан музокараларга клубнинг спорт директори Андреа Берта бошчилик қилмоқда. У аввал «Атлетико» тизимида фаолият юритгани сабабли мадридликлар билан яхши алоқаларга эга.
Аввалроқ Хулиан Альварес Испанияда қолишга қарши эмаслиги хабар қилинганди. Унинг вазиятини «Барселона» ва «Реал» ҳам кузатиб борган. Аммо «Атлетико» ўзининг тўғридан-тўғри рақибларини кучайтириш ниятида эмас. Шунингдек, футболчига «ПСЖ» ҳам қизиқиш билдирган.
Хабар қилинишича, айнан Хулиан Альварес «Арсенал»нинг жорий ёзги трансферлар ойнасида ҳужум чизиғини кучайтириш учун асосий номзоди ҳисобланади.
Эслатиб ўтамиз, «Атлетико» ўтган ёзда 26 ёшли аргентиналик ҳужумчини «Манчестер Сити»дан 75 миллион евро эвазига ўз сафига қўшиб олган эди. Альварес 2025/2026 йилги мавсумда барча мусобақаларда 49 та учрашувда иштирок этиб, 20 та гол урди ва 9 та голли узатмани амалга оширди.
