\"Арсенал\" Альварес трансферига муқобил вариантни \"Барселона\"дан топди
"Арсенал" ҳужум чизиғини кучайтириш бўйича ишларини давом эттирмоқда. Лондон клуби асосий трансфер мақсади бўлиб турган Хулиан Альваресни қўлга кирита олмаса, эътиборини "Барселона" ҳужумчиси Ферран Торресга қаратиши мумкин.
Маълумотларга кўра, Альвареснинг "Барселона"га ўтишни афзал кўраётгани ва "Атлетико" билан музокараларнинг мураккаб кечаётгани сабабли "Арсенал" муқобил вариантларни ўрганишни бошлаган. Шу рўйхатдан Ферран Торрес ҳам жой олган.
27 ёшли испаниялик футболчи "Барселона" сафида бир нечта позицияда ҳаракат қила олиши билан ажралиб туради. У марказий ҳужумчи, чап ва ўнг қанотда ҳам самарали ўйнай олади. Айни шу универсаллик Микел Артета жамоаси эътиборини тортгани айтилмоқда.
Ҳозирча томонлар ўртасида расмий музокаралар бошланганига оид маълумот йўқ. Бироқ "Арсенал" трансфер ойнаси якунга қадар ҳужум чизиғини кучайтиришни режалаштирмоқда ва Ферран Торрес ушбу йўналишдаги асосий номзодлардан бири сифатида кўрилмоқда.
