Ҳарри Кейн Чемпионлар Лигаси тўпурарлари рўйхатида кучли ўнликка кирди
Мюнхеннинг «Бавария» клуби ҳужумчиси Ҳарри Кейн УЕФА Чемпионлар Лигаси 1/8 финал доирасидаги «Аталанта»га қарши баҳсда (4:1) дубль қайд этди. Шу тариқа, англиялик футболчининг қитъанинг энг нуфузли турниридаги голлари сони 66 та ўйинда 50 тага етди.
Ушбу натижа орқали Кейн ўз фаолиятини 48 та гол билан якунлаган Андрей Шевченко ва Златан Ибрагимовичдан ўзиб кетди. Шунингдек, у ҳисобида 49 та гол бўлган афсонавий Алфредо Ди Стефанони ҳам орқада қолдиришга муваффақ бўлди.
Ҳозирда Ҳарри Кейн мусобақа тарихидаги энг яхши тўпурарлар рўйхатида 50 та гол билан Муҳаммад Салаҳ ва Тьерри Анри билан биргаликда 10-поғонани эгаллаб турибди. Мазкур рўйхатда «Спортинг», «Манчестер Юнайтед», «Реал» ва «Ювентус» клублари сафида жами 140 та гол урган Криштиану Роналду пешқадамлик қилмоқда.
